Art dhe Letërsi

Krijimtaria ime letrare dhe artistike ka filluar herët, qysh në kohën e gjimnazit. Në vitin e tretë shkollor botova librin tim të parë me poezi, të titulluar “Pamje nëpërmjet Grilave”, një përmbledhje që pasqyronte ndjenjat, ëndrrat dhe sfidat e një të riu shqiptar në kërkim të lirisë shpirtërore. Ky ishte hapi i parë drejt një rruge ku fjala dhe arti u bënë pjesë e pandarë e identitetit tim.

Pas migrimit tim në Zvicër, krijimtaria letrare mori një dimension të ri. I shqetësuar nga zhvillimet politike dhe shoqërore në vendlindje, në vitin 2012 shkrova veprën poetike satirike “Truri Pistë”, ku përmes ironisë dhe reflektimit kritik ngrita zërin kundër padrejtësive dhe realiteteve të hidhura të kohës. Përveç këtyre, kam punuar edhe mbi disa dorëshkrime të tjera që mbeten ende të papërfunduara, por që shumë shpejt do të pasohen nga një botim i ri që është në përgatitje.

Sa i përket artit pamor, pasioni im nisi që në shkollën e mesme, ku organizova ekspozitën e parë në Kërçovë. Kjo përvojë u pasua nga një rrugëtim më i thellë në art, me punime të fokusuara kryesisht në teknikën e vijës dhe ekspresionin personal. Për ekspozitën e dytë në Zvicër kam punuar gjatë, duke krijuar vepra specifike dhe të veçanta, edhe pse aktivitetet e shumta në fushën e lobimit dhe angazhimit shoqëror e ngadalësuan ritmin e këtij procesi.

Arti dhe letërsia për mua nuk janë vetëm pasion, por forma të komunikimit shpirtëror dhe intelektual, ku fjala dhe imazhi bëhen ura që lidhin realitetin e brendshëm me atë shoqëror. Nëpërmjet tyre, unë shpreh brengat, shpresat dhe vizionet për një shoqëri më të drejtë, më të bashkuar dhe më humane.